الباب شبه المغلق (ما بين وهم الامل و سجن الروح )

اقفلوا الصفحات القديمة وافتحوا صفحات جديدة على نضافة وعلاقات محترمة

في ناس ماتت وهي لسه عايشة لأنهم فضلوا محبوسين جوه صفحة كان لازم تتقفل من زمان

وفي ناس بدأت تعيش من أول لحظة خدت فيها القرار الأصعب إنها تسيب الماضي مكانه وتمشي من غير ما تبص وراها

أوعى تفتكر إن اللي بيكسرك يستحق فرصة جديدة كل مرة وأوعى تصدق إن الوجع المستمر اسمه حب أو إن الإهانة اسمها تعلق أو إن الخذلان المتكرر مجرد سوء تفاهم

في لحظة من حياتك لازم تقف قدام نفسك وتسألها سؤال واحد هو ليه لسه عايش جوه حكايات انتهت وليه لسه شايل وجع ناس اختارت تمشي وليه كل يوم بترجع تقلب في صفحات عمرها ما هتتكتب من جديد الحقيقة إن في ناس بتضيع سنين من عمرها وهي مستنية اعتذار مش هييجي أو رجوع شخص خلاص اختار طريق غير طريقها أو تغيير إنسان أثبت ميت مرة إنه مش عايز يتغير ودي أكبر سرقة للعمر لأن الوقت اللي بيضيع في التعلق بالماضي عمره ما بيرجع

اقفلوا الصفحات القديمة لأن الصفحة اللي انتهت مش معناها نهاية حياتك لكنها نهاية مرحلة كانت لازم تخلص علشان تبدأ مرحلة أجمل وأهدى وأنضف مفيش معنى إنك تفضل ماسك في علاقة كانت بتكسرك كل يوم أو صداقة كانت بتستهلك طاقتك أو حب كان بيخليك تنام كل ليلة مكسور القلب الإنسان اللي بيحب نفسه بجد بيعرف إمتى يقفل الباب من غير ما يفضل واقف وراه يستنى حد يفتحه

الحياة علمتنا إن مش كل اللي دخل حياتنا كان نصيب يكمل لكن أكيد كل شخص دخل حياتنا كان درس يعلمنا حاجة يعلمنا مين يستحق الثقة ومين يستحق البعد يعلمنا قيمة الكلمة الطيبة ويعلمنا كمان إن الاحترام مش طلب لكنه أساس أي علاقة سوية

في ناس فاكرة إن القوة إنها تفضل متمسكة بأي حد حتى لو بيهينها لكن الحقيقة إن القوة الحقيقية هي إنك تعرف تمشي في الوقت الصح وإنك تعرف تقول كفاية قبل ما تخسر نفسك لأن مفيش علاقة في الدنيا تستحق إنك تدفع فيها سلامك النفسي أو كرامتك أو احترامك لنفسك

افتحوا صفحات جديدة على نضافة نضافة قلب ونضافة نية ونضافة مشاعر ادخلوا أي علاقة جديدة وأنتم مش شايلين ذنب حد تاني ولا خوف من تجربة قديمة ولا شك بسبب شخص خان الثقة لأن اللي ظلمك مش هو كل الناس واللي كسر قلبك مش معناه إن كل القلوب هتكسرك

لسه الدنيا فيها ناس كويسة بجد ناس لما تدخل حياتك تحس إن الدنيا لسه بخير ناس وجودها بيهون التعب وكلامها بيطمن القلب وتصرفاتها بتأكد إن الاحترام لسه موجود وإن الأصل الطيب عمره ما اختفى يمكن لأننا بقينا مركزين مع النماذج السيئة فنسينا إن حوالينا ناس تستحق الحب والتقدير والثقة

العلاقات المحترمة مش مبنية على المصالح ولا على السيطرة ولا على الاستغلال العلاقات المحترمة مبنية على التقدير والاحتواء والصدق والوضوح وعلى إن كل طرف يحافظ على مشاعر التاني حتى وقت الخلاف لأن الاحترام الحقيقي بيظهر وقت الاختلاف مش وقت الاتفاق

متخليش تجربة واحدة تخليك تقفل قلبك للأبد لأن ربنا قادر يعوضك بإنسان يمسح أثر كل الوجع اللي فات وقادر يرزقك بصديق يكون أخ وبشريك حياة يكون أمان وبناس تشوف فيهم الخير اللي افتقدته سنين طويلة لكن التعويض عمره ما يدخل قلب مليان بذكريات مؤلمة ومليان غضب وعتاب

سامح نفسك على كل مرة وثقت في الشخص الغلط وعلى كل مرة اديت فرص أكتر من اللازم وعلى كل مرة سكت فيها خوفا من الفقد لأنك كنت بتتصرف بقلبك وربنا وحده يعلم نيتك لكن من النهارده اتعلم إن أي علاقة تخسرك نفسك لازم تسيبها وأي باب يدخلك وجع مستمر لازم تقفله من غير تردد

افتح شبابيك النور في حياتك واستقبل أيام جديدة ووجوه جديدة وفرص جديدة وسيب الماضي في مكانه الطبيعي وراه ضهرك لأن اللي فات انتهى واللي جاي لسه بيتكتب وربنا دايما بيخبي بعد الصبر أجمل التعويضات وبعد الانكسار أكبر الجبر وبعد الدموع أوسع الأرزاق

صدق إن الحياة لسه فيها ناس كويسة ولسه فيها قلوب نقية ولسه فيها علاقات محترمة مبنية على الحب والوفاء والرحمة والتقدير ولسه فيها أشخاص هيحاربوا علشان يحافظوا عليك مش علشان يكسروك وهيختاروا وجودك كل يوم من غير تردد وهيكونوا سبب في إنك ترجع تبتسم بعد سنين من التعب

اقفلوا الصفحات القديمة بكل شجاعة وافتحوا صفحات جديدة بكل أمل لأن الحياة لا تتوقف عند شخص ولا تنتهي بسبب علاقة ولا تنطفئ بسبب خذلان وكل نهاية كانت تؤلمك ربما كانت في الحقيقة أعظم بداية كتبها الله لك حتى تصل إلى المكان الذي تستحقه وإلى الأشخاص الذين يشبهون نقاء قلبك ويضيفون لحياتك سلاما وفرحة وطمأنينة تجعل كل ما مضى مجرد ذكرى بعيدة لا تملك أي قدرة على سرقة مستقبلك من جديد